ရုံးက Ferry ဒါမှမဟုတ် Bus ကားစီးရင်း အိပ်ငိုက်နေမယ် ၊ ဒါ့အပြင် အလုပ်စလုပ်မယ်ဆိုပြီးထိုင်လိုက်ပေမယ့် ဘာပြီးရင် ဘာလုပ်ရမှန်းမသိ ကြောင်တောင်တောင်ဖြစ်နေမယ် ၊ အလုပ်လုပ်ရင်းပျင်းနေမယ်ဆိုရင်တောင်မှ ဒီစာလေးကိုမပျင်းပဲ အဆုံးထိဖတ်ကြည့်ဖို့ အရင်ဦးဆုံးတိုက်တွန်းလိုက်ပါတယ်။ လုပ်ငန်းခွင်မှာ တက်တက်ကြွကြွမဖြစ်ရတဲ့ အကြောင်းအရင်းရဲ့နောက်ကွယ်မှာ အိပ်ရေးမဝတာအပြင် ကျန်းမာရေးနဲ့ညီညွတ်တဲ့ အစားအသောက်မရွေးချယ်တာ အစရှိတဲ့ အကြောင်းအရင်းများစွာရှိတယ်ဆိုပေမယ့် ဘယ်လိုအကြောင်းကြောင့်ပဲဖြစ်ဖြစ် လုပ်ငန်းခွင်မှာ တက်တက်ကြွကြွဖြစ်မနေဘူးဆိုတဲ့ ကျွန်တော်တို့လိုဝန်ထမ်းတွေအတွက် ဖြေရှင်းလို့ရနိုင်တဲ့ နည်းလမ်းကောင်းလေးတွေရှိပါတယ်။ ပထမဆုံးအချက်အနေနဲ့..
(၁) Stretch
ကွန်ပြူတာအသုံးများရတဲ့ ဝန်ထမ်းတွေဆိုရင် Screen ကို နာရီပေါင်းများစွာကြည့်နေရတဲ့အတွက် မလိုလားအပ်တဲ့ Stress တွေ ၊ ဇာတ်ကြောတတ်တာတွေ ၊ မျက်စိကိုက်တာတွေအပြင် လူ့ရဲ့စိတ်ကိုလည်းထိုင်းမှိုင်းစေတတ်ပါတယ်။ ဒီလိုဖြစ်ရတဲ့ အကြောင်းအရင်းက ကျွန်တော်တို့ရဲ့လည်ပင်းကို ရှေ့တိုးပြီး ကြည့်တဲ့အခါမှာ နောက်မှာရှိတဲ့ ဇက်ကြောကတင်းပြီး ဒါဏ်ဖြစ်တာပါ။ ထိုင်နေရင်း အကြောဆန့်တာဖြစ်ဖြစ် ၊ လမ်းလျှောက်တာဖြစ်ဖြစ် လုပ်တာက ကျန်းမာရေးအတွက်လည်း အထောက်အကူဖြစ်သလို စိတ်ကိုလည်းလန်းဆန်းစေပါတယ်။
(၂) Volunteer for the coffee run
အခြားတစ်ယောက်ကို လမ်းကြုံလို့ Coffee ဖျော်ခိုင်းတာပဲဖြစ်ဖြစ် ၊ ရေထည့်ခိုင်းတာပဲဖြစ်ဖြစ် တစ်ခုခုခိုင်းလိုက်တာထက် သူတို့အတွက် ကိုယ်ကိုယ်တိုင်ပဲထလုပ်ပေးလိုက်ပါ။ ကိုယ့်ရဲ့ အလုပ်စားပွဲမှာထိုင်နေရတာထက်စာရင် လှုပ်လှုပ်ရှားရှားလေးလည်းဖြစ်တယ်။ ဒါ့အပြင် အခြားရေလာထည့်တဲ့သူတွေ ၊ Coffee လာဖျော်တဲ့သူတွေရှိရင်လည်း စကားလေးပြောရင်း ကိုယ့်ရဲ့ Social Skill ကိုလည်းတိုးမြှင့်လို့ရသလို Network လည်းကျယ်ပြန့်လာမှာပါ။
(၃) Wear comfortable clothes and shoes
နိုင်ငံတကာ စစ်တမ်းတွေအရ လုပ်ငန်းခွင်မှာ သက်သောင့်သက်သာဖြစ်မယ့် အဝတ်အစားတွေ ၊ ကိုယ်ကြိုက်နှစ်သက်တဲ့ အင်္ကျီတွေဝတ်ထားတဲ့အချိန်မှာဆိုရင် ဝန်ထမ်းတော်တော်များများက ပုံမှန်ထက် ပိုပြီးတက်တက်ကြွကြွရှိကြောင်းဖော်ပြထားတာလည်းတွေ့ရပါတယ်။ သင့်ရဲ့ ကုမ္ပဏီ Dress Code က Formal ဆန်ဆန်ပဲဝတ်ရတယ်ဆိုရင်တောင်မှ Formal ဆန်တာကို သက်သောင့်သက်သာဖြစ်အောင်ဝတ်လို့ရတဲ့နည်းလမ်းတွေအများကြီးရှိပါတယ်။ တစ်နေရာနဲ့တစ်နေရာ သွားရတာလှမ်းတဲ့ မိန်းကလေးတွေအနေနဲ့ဆိုရင်လည်း ဒေါက်ဖိနစ်အစား Shoes လေးတွေပြောင်းစီးလို့ရနိုင်ပါတယ်။
(၄) Walk instead of calling or emailing
သင့်ရဲ့အလုပ်စားပွဲကနေ ထလို့ရမယ့် အခွင့်အရေးတွေ ၊ နည်းလမ်းတွေရှိရင် အကုန်အသုံးချပါ။ အလုပ်ကိစ္စနဲ့ ပတ်သက်ပြီး Email ပို့ထားတဲ့အရာကို Confirm လုပ်ရမယ့်ကိစ္စတွေရှိရင် တစ်ခြား Social Media ကပို့တာထက် သူတို့ရှိတဲ့ စားပွဲကိုသွားပြီး ” အစ်ကိုရေ.. အစ်မရေ.. ဒီ File လေး Mail ကတစ်ဆင့်ပို့ပေးထားပါတယ် ” ဆိုပြီးပြောလို့ရနိုင်ပါတယ်။ အကျိုးကျေးဇူးအနေနဲ့ကတော့ Social Interaction လို့ခေါ်တဲ့ လူမှုဆက်ဆံရေးပါကောင်းလာမှာပါ။
(၅) Get moving at lunch time
အလုပ်ကို တက်တက်ကြွကြွနဲ့ လုပ်နိုင်တယ် ၊ မလုပ်နိုင်ဘူးဆိုတာကလည်း ကိုယ်စားတဲ့ အစားအသောက်နဲ့ အများကြီးသက်ဆိုင်ပါတယ်။ ဆီများတဲ့ အစားအစာတွေ ၊ ကယ်လိုရီများတဲ့ အစားအစာတွေ အကြိုက်တွေ့တဲ့သူဆိုရင် ပိုပြီးသတိထားဖို့လိုပါတယ်။ အလုပ်စားပွဲမှာစားတာထက် ကိုယ့်ရဲ့လုပ်ဖော်ကိုင်ဖက်တွေနဲ့ လ္ဘက်ရည်သွားသောက်တာဖြစ်ဖြစ် ၊ ဆိုင်တစ်ဆိုင်သွားထိုင်စားတာမျိုးလုပ်ပေးခြင်းအားဖြင့် မိတ်ဆွေကြားဆက်ဆံရေးလည်း ပိုမိုကောင်းမွန်လာမှာပါ။ ဒါ့အပြင် Lunch Time မှာ (၅)မိနစ် (၁၀)မိနစ်လောက် ကောင်းမွန်တဲ့အနားယူခြင်းကလည်း အလုပ်ပြန်လုပ်တဲ့အခါမှာ ပိုပြီးထိထိရောက်ရောက်လုပ်နိုင်တာတွေ့ရမှာပါ။
အလေ့အကျင့်တစ်ခုဆိုတာ နေ့ချင်းညချင်းဖြစ်မလာပေမယ့် အကျိုးရှိမယ့် အရာတွေကိုတော့ ကိုယ့်ရဲ့ နေ့စဉ်လုပ်ရိုးလုပ်စဉ်တွေမှာ ထည့်သွင်းနိုင်ရင်တော့ အကောင်းဆုံးပါ။ အပေါ်ကအချက်လေးတွေကတော့ လုပ်ငန်းခွင်မှာ အိပ်ငိုက်နေမယ်ဆိုရင် လက်တွေ့အသုံးချလို့ရတဲ့နည်းလမ်းကောင်းလေးတွေပဲဖြစ်တဲ့အတွက် အကျိုးရှိစွာအသုံးချနိုင်ဖို့မျှော်လင့်ပါတယ်ခင်ဗျ။
Content By Htet Wai Yan Lynn
