လုပ်ငန်းခွင်မှာ ဒီလိုအမူအကျင့်တွေ လုပ်မိနေပြီလား?

ပထမဦးဆုံးအနေနဲ့ သေချာတာတစ်ခုကတော့ ကျွန်တော်တို့ရဲ့အချိန်တော်တော်များများဟာ လုပ်ငန်းခွင်မှာပဲ ကုန်ဆုံးနေရပါတယ်။ နိုင်ငံတကာစစ်တမ်းတွေအရ ကြည့်ပြန်ရင်လည်း လူတစ်ယောက်ဟာ သူ့သက်တမ်းရဲ့ သုံးပုံတစ်ပုံဟာ အလုပ်မှာပဲအချိန်ကုန်ဆုံးနေတယ်လို့ဖော်ပြထားပါတယ်။ လုပ်ငန်းခွင်ဆိုတာ ကိုယ်တစ်ယောက်တည်းရှိတဲ့နေရာမဟုတ်တဲ့အတွက် အများနဲ့ပေါင်းသင်းဆက်ဆံရေးကောင်းဖို့ကလည်းအရေးကြီးပါတယ်။ ဒါပေမယ့် တစ်ခါတစ်လေမှာ ကိုယ့်ရဲ့မသိစိတ်ကပြုလုပ်လိုက်တဲ့အရာတွေက မထင်မှတ်ထားပဲ အခြားသူတွေအတွက် အနှောင့်အယှက်ဖြစ်ရတာလေးတွေရှိတတ်ပါတယ်။ ဒီတော့ ဘယ်လိုအချက်လေးတွေကို လုပ်ငန်းခွင်မှာ ဆင်ခြင်ပြီးနေထိုင်သင့်တယ်ဆိုတာကိုပြောပြပေးချင်ပါတယ်။

(၁) Being Late

အလုပ်လုပ်ချိန်က မနက်(၉)နာရီကနေ ညနေ(၅)နာရီအထိသတ်မှတ်ထားတယ်ဆိုရင် မနက်(၉)နာရီထိုးတာနဲ့ ကိုယ့်ရဲ့စားပွဲအရှေ့မှာ ထိုင်ပြီး အလုပ်စလုပ်နေတဲ့ပုံစံမျိုးဖြစ်နေရပါမယ်။ ရုံးနောက်ကျတာအပါအဝင် ၊ ရုံးရောက်တာနဲ့ ယောင်လည်လည်လုပ်နေတာ ၊ (၉)နာရီကျော် ရုံးရောက်မှ မနက်စာစားတာတွေဆိုတာ လုပ်လည်းမလုပ်သင့်သလိုဖြစ်လည်းမဖြစ်သင့်ပါဘူး။ အကောင်းဆုံးကတော့ (၉)နာရီ ရုံးတက်ရမယ်ဆိုရင် (၈)နာရီ (၄၅)မိနစ်ရောက်အောင်သွားတာက အကောင်းဆုံးပါပဲ။

(၂) Refuse to do your Job

တစ်ခါတစ်လေ ကိုယ့်ရဲ့သူဌေးက Personal ကိစ္စအရ အကူအညီတောင်းတဲ့အခါမျိုးမှာ ကိုယ့်ရဲ့ KPI တွေမပြီးဘူး ၊ အချိန်ကုန်တယ် ၊ ငါလုပ်ရမယ့် JD မှာ ဒီလိုတာဝန်တွေမပါဘူးဆိုပြီး ငြင်းလို့မရပါဘူး။ ကိုယ့်ရဲ့ Career ကို Professional ကျကျသွားမယ်ဆိုရင် အလားတူပဲ ကိုယ်တာဝန်ယူရတဲ့ Responsibilities တွေကလည်းပိုမိုကျယ်ပြန့်လာမှာပါ။ ဒီလိုကိစ္စသေးသေးလေးကိုမှ အကူအညီတောင်းလို့မရဘူးဆိုရင် ကိုယ့်ရဲ့အထက်လူကြီးတစ်ယောက်အနေနဲ့ ကိုယ့်အစား တစ်ခြားတစ်ယောက်ကိုအစားထိုးသွားနိုင်ပါတယ်။ ဒီတော့ ကိုယ့်ကိုယ်ယုံကြည်လို့ခိုင်းတယ်ဆိုတဲ့စိတ်ထားလေးနဲ့ကူညီတာ အကောင်းဆုံးပါပဲ။

(၃) Using your cell phone during meetings

အလုပ်ကိစ္စနဲ့မဟုတ်ပဲ ကိုယ့်ရဲ့ Personal Case အရ Facebook သုံးတာ ၊ Instagram သုံးတာတွေက မလုပ်သင့်ဆုံးအမှားတစ်ခုပါပဲ။ Meeting လုပ်နေတဲ့အချိန်မှာပိုပြီးမသင့်တော်ဆုံးပါပဲ။ Meeting မှာအိပ်ငိုက်လာမယ် ၊ ပျင်းလာမယ်ဆိုရင် စက္ကူတစ်ရွက်နဲ့ ဘောပင်တစ်ချောင်းကောက်ယူပြီး Meeting Notes လိုက်မှတ်လိုက်ပါ။ လူကိုလည်း နိုးနိုးကြားကြားဖြစ်စေသလို ကိုယ့်အထက်လူကြီးတွေရဲ့ သဘောကျနှစ်သက်မှုကိုပါ ခံရအုံးမှာပါ။

(၄) Gossiping

Gossip ရဲ့အဓိပ္ပာယ်က အတင်းတုတ်တာလို့ အဓိပ္ပာယ်ရပါတယ်။ ဒုတိယမိသားစုလို့ခေါ်လို့ရတဲ့ လုပ်ငန်းခွင်မှာ အချိန်တစ်ခုကြာလာတဲ့အခါမှာ ကိုယ့်ရဲ့လုပ်ဖော်ကိုင်ဖက်တွေအပေါ် ကိုယ့်ရဲ့ထင်မြင်ချက်တွေရှိကောင်းရှိလာနိုင်ပါတယ်။ ဘယ်သူကတော့အလုပ်လုပ်ရာမှာစည်းစနစ်ကျတယ် ၊ ဘယ်သူကတော့ရေသာခိုတယ်ဆိုတာ (၃) ၊ (၄) လလောက်နေရင်သိလာမှာပါ။ အဓိကက ကိုယ့်ရဲ့ထင်မြင်ချက်ကိုကိုယ့်ရဲ့ စိတ်ထဲမှာပဲထားသင့်ပါတယ်။ အတင်းပြောချင်းရဲ့ နောက်ဆက်တွဲအနေနဲ့ ကိုယ့်ရဲ့ ဂုဏ်သတင်းကိုလည်းထိခိုက်နိုင်သလို ၊ HR နဲ့လည်းပြဿနာဖြစ်နိုင်ပါတယ်။

(၅) Making small talk when someone is busy

လုပ်ငန်းခွင်မှာတစ်ယောက်နဲ့တစ်ယောက်ရင်းနှီးဖို့ အကောင်းဆုံးနည်းလမ်းက တစ်ယောက်အကြောင်းတစ်ယောက်သိဖို့ စကားပြောတာကနေ စပြောတာပါပဲ။ ဒါပေမယ့် အချိန်အခါကြည့်ပြောဖို့တော့လိုပါတယ်။ အလုပ်ကိစ္စဖုန်းပြောနေတဲ့အချိန် ၊ အလုပ်ရှုပ်နေတဲ့အချိန်မျိုးမှာသွားပြောရင်တော့ စိတ်အနှောင့်အယှက်ဖြစ်သွားတတ်ပါတယ်။

ကိုယ်ကိုယ်တိုင်က ဝန်ထမ်းကောင်းတစ်ယောက်အဖြစ် နာမည်ကောင်းနဲ့ ရပ်တည်နေရင်တောင်မှ အပေါ်က အမူအကျင့် (၅)ခုကို သတိမမူမိရင်တော့ သင့်ကို ပြဿနာဖြစ်စေနိုင်ပါတယ်။ ကိုယ့်ရဲ့ Career မှာအောင်မြင်ရမယ်ဆိုပြီး အလေးအနက်ထားတဲ့သူဆိုရင် ပိုပြီးသတိထားဖို့လိုပါတယ်။ ရှေ့ဆက်ပြီး အောင်မြင်တဲ့လုပ်ငန်းရှင်တွေ ၊ ပျော်ရွှင်စရာကောင်းတဲ့ ပတ်ဝန်းကျင်တွေ ပိုင်ဆိုင်ကြပါစေလို့ ဆန္ဒပြုလိုက်ပါတယ်။

Content By Htet Wai Yan Lynn